REJISTARA YA TŠHIRELETŠO YA BANA KE ENG?
Rejistara ya tšhireletšo ya bana e fa lenaneo la bana ba mengwaga ya ka fase ga 18, bao ba hlokago tšhireletšo. Rejistara e swarwa ke modirelaleago Kgorong ya selegae ya Tšwetšopele ya Leago. Tshedimošo yeo e lego ka gare ga rejistara e swanetšwe e swarwe bjalo ka sephiri gomme e ka bonwa fela ke bao ba bopago karolo ya sehlopha sa Tšhireletšo ya Bana (mohlala: morutiši / mooki / ngaka / modirelaleago / mohlokomedi / lephodisa / maseterata, bj.bj).
Go swara lenaneo la bana bao ba lego kotsing bao ba hlokago ditirelo tša leago.
Go kopanya ngwana gammogo le lapa la gagwe ka pela ka mo go ka kgonegago le modirelaleago (mofana ka tirelo)
Go hlokomela taba ye nngwe le ye nngwe go netefatša gore tirelo ya khwalithi e filwe ngwana le lapa la gabo.
KE MANG A SWANETŠEGO A BEGE NENG/KAE?
Go ya ka Molao wa Tlhokomelo ya Bana (wa 74 wa 1983) batho ba ba latelago ba profešene ba swanetše ke go bega kgonono efe goba efe ya tlhorišo ya ngwana goba go se swarwe ga ngwana ka tsela ya maleba.
Ngaka ya meno, ngaka ya kalafi, mooki, modirelaleago, morutiši, motho ofe goba ofe yoo a thwetšwego goba a laolago Legae la Bana goba Lefelo la Tlhokomelo goba Botšhabelo.
NENG
Ka pelapela ge kgonono ya tlhorišo ya ngwana e lemogwa ge a hlahlobja, a šoma goba a šetša ngwana, e swanetšwe e begwe go modirelaleago wa kgauswi le moo go dulago ngwana yoo.
KAE
Kantorong ya ditirelo tša leago ya kgauswi le moo ngwana a dulago gona.
Leloko lefe goba lefe la setšhaba/badudi bao ba amegago ba ka šupetša tlhorišo ya ngwana yeo ba belaelago gore e gona gomme ba ka e bega go modirelaleago. Bašupi bao ba tla ba ba ka sephiring. O swanetše gore o tsebe dilo tše di latelago:
Go bontšha dintlha tša Ngwana
Go bontšha dintlha tša batswadi ba ngwana ba madi/bahlokomedi.
Aterese ya moo ngwana a dulago gona ga bjale gape ge eba ga a dule le batswadi, go laetšwe le aterese ya batswadi.
Matšatšikgwedi le mehuta ya ditlhorišo.
Dintlha tša mabaka ao a dirago gore go be le kgonono.
Histori efe goba efe ya ditlhorišo tša peleng.
Dintlha dife goba dife tša go ikopanya tša batho ba bangwe bao ba ka fago bohlatse bja tlhorišo yeo e belaelwago.
Dintlha tša gago tša boikopanyo godimo ga faele di bohlokwa gore ge modirelaleago a ka rata go ikopanya le wena go netefatša tše dingwe tša dintlha le wena a kgone go dira bjalo.
MEHUTA YA DITLHORIŠO
Tlhorišo ya thobalano: Go šomiša ngwana mererong ya thobalano.
Tlhorišo ya maikutlo: E ka tla ka sebopego sa go hlolega go fihlelela hlokego ya ngwana ya lerato, šedi, hlohleletšo goba e ka ba ka go rogaka ngwana, go mo hlokomologa, go mo tšhošetša ka bošoro goba go leka go mo tšhoša.
Tlhokomologo: Hlolego yeo e tšwelago pele ya go šireletša ngwana kotsing, phefong, tlaleng, go se šetše dintlha tše bohlokwa tša tlhokomelo, bj.bj.
GO DIREGA ENG KA MORAGO GA GE PEGO E DIRILWE GOMME E LOKETŠWE KA GARE GA FAELE?
Modirelaleago o tla etela ngwana le ba lapa la gabo go lekodiša gore ngwana yoo o hloka tlhokomelo le tšhireletšo naa.
Mo mabakeng ao e lego gore motho yoo go begilwego gore ke yena a hlorišago ngwana o dula le ngwana ka ntlong e tee, motho yoo a ka kgopelwa gore a tšwe ka mo ntlong yeo. Ge go sa kgonege, ngwana a ka dula le moagišani, mogwera, moloko goba lefelong la tšhireletšo lebakanyana la motšwaoswere.
GE GO BEGWA TLHORIŠO, A BANA KA MEHLA BA TLOŠWA KA LAPENG?
Aowa, ke ge fela bophelo bja ngwana bo le kotsing. Molao wa gore ngwana a dule le motswadi lebaka le le telele ka mo go kgonegago ka gona o swanetšwe o latelwe ka tlhompho. Ge go tšewa sephetho sefe goba sefe go swanetšwe go netefatšwe gore ngwana o tla pele ga dilo tše ka moka. Ba lapa le bana ba swanetše ba be karolo ya go tšea sephetho sefe goba sefe mo maemong a bona.
A NA DITOKELO TŠA BATSWADI DI AMA KE REJISTARA YA TŠHIRELETŠO YA BANA?
Aowa, boingwadišo ka bo bona ga bo ame maikarabelo a molao a motswadi goba mohlokomedi go ngwana. A amega fela ge sephetho sa molao se tšerwe (mohlala, go tlošwa ga ngwana).
DINOMORO TŠA MEGALA
Mogala wa Bana: 0800 05 55 55
Mogala wa Tšhoganetšo wa Maphodisa: 10111
Tšwetšopele ya Leago: 0800 60 10 11
E tšwa go:
Kgoro ya Tšwetšopele ya Leago
Dintlha tša go Ikopanya:
Ngwaga ya Boditšhabatšhaba wa Lapa
